ភ្នំពេញ៖ គណៈកម្មាធិការសិទ្ធិមនុស្សកម្ពុជាគ្រោងបង្កើតកម្មវិធីទូរស័ព្ទ ឬ App សម្រាប់ឱ្យពលរដ្ឋដើម្បីសម្រួលដល់ការរាយការណ៍ពីករណីរំលោភសិទ្ធិមនុស្ស និងដោះស្រាយទាន់ពេលវេលា។

ថ្លែងប្រាប់ក្រុមអ្នកសារព័ត៌មានក្នុងឱកាសប្រារព្ធពិធីអបអរខួប៧៥ឆ្នាំ នៃទិវាសិទ្ធិមនុស្សអន្តរជាតិ ១០ធ្នូ នៅសាកលវិទ្យាល័យភូមិន្ទភ្នំពេញ ព្រឹកថ្ងៃទី៨ ខែធ្នូ ឆ្នាំ២០២២នេះ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានថ្លែងថាពេលនេះក្រុមការងារបច្ចេកទេសរបស់គណៈកម្មាធិការបានសិក្សា និងត្រៀមរួចរាល់ហើយដើម្បីបង្កើតកម្មវិធីទូរស័ព្ទនេះនៅតែបញ្ហាថវិកាក្នុងការរៀបចំប៉ុណ្ណោះ។

លោកថា៖ «តទៅមុខទៀតគឺយើងប្រើ App ទូរស័ព្ទយើងចុចចូលមកប្ដឹងតែម្ដងពីគ្រប់កន្លែងក្នុងប្រទេសកម្ពុជាយើងចេញពីណាក៏បានមិនចាំបាច់យកក្រដាក់ hard copy មកដាក់នៅគណកម្មាធិការសិទ្ធិមនុស្សទេ»។

លោកបន្ថែមថា ការជួយដោះស្រាយបញ្ហាសិទ្ធិពលរដ្ឋនេះគឺមានសារៈសំខាន់ណាស់ក្នុងការជួយកាត់បន្ថយកំហឹងរបស់ប្រជាពលរដ្ឋដែលរងគ្រោះណាមួយដោយអយុត្តិធម៌។

លោកថា៖ «គឺជាការប្រព្រឹត្តរបស់បុគ្គលខ្លះដែលគាត់មានអំណាច មានលុយ ចរិកអាក្រក់ ចរិតអន់ មើលងាយអ្នកក្រីក្រទៅ ជួនកាលមានទំនាស់បន្តិចបន្ដួចប្រើប្រាស់លុយផ្ដេសផ្ដាសចាប់មនុស្សយកទៅដាក់គុក។ អញ្ចឹងបានជាគណកម្មាធិការសិទ្ធិមនុស្សជួយដល់រឿងហ្នឹង ក្មេងមិនគ្រប់អាយុ កូនក្មេងអីហ្នឹង គឺយើងធានាយកពីពន្ធនាគារដាក់ក្នុងមណ្ឌល អប់រំកែប្រែ ដើម្បីជួយសម្រួលដល់ការងារនេះ»។

លោកប្រធានគណៈកម្មាធិការជឿថាក្រោយពី App នេះត្រូវបានដាក់ឱ្យប្រើប្រាស់បណ្ដឹងអាចនឹងកើនឡើងច្រើនជាមុន ខណៈក្នុងឆ្នាំនេះគណៈកម្មាធិការជាតិមួយនេះទទួលបណ្ដឹងទាក់ទងនឹងសិទ្ធិមនុស្សត្រឹមជាង២០បណ្ដឹងប៉ុណ្ណោះ៕